Անդրիաս Ղուկասյանը չի վստահում ''պետական'' բժիշկներին

Նախագահի թեկնածու Անդրիաս Ղուկասյանի հարաբերությունները լրագրողների հետ այսուհետ ավելի սահմանափակ կլինեն, քանի որ նրա էներգիան գնալով պակասում է. լրագրողներին այսօր հայտնեց Ղուկասյանի շտաբի համակարգող Արմեն Գրիգորյանը:

Նա տեղեկացրեց, որ Անդրիաս Ղուկասյանի որոշումը չի փոխվել` շարունակելու է հացադուլը` նույն վայրում, հավանաբար` մինչեւ փետրվարի 19-ը: Այսինքն` մինչեւ ընտրությունների ավարտ Ղուկասյանը կլինի հացադուլի մեջ: Սա, Գրիգորյանի կարծիքով, այնպիսի խնդիրներ չի առաջացնի, որ նախագահի թեկնածուի կյանքին վտանգ սպառնա, անհաղթահարելի խոչընդոտ թեկնածուի համար չի ստեղծվի, եւ ընտրություններն էլ նրա առողջական վիճակի պատճառով չեն հետաձգվի:

Արմեն Գրիգորյանը հայտնեց, որ իրենք ունեն ծանոթ բժիշկներ, ովքեր հետեւում, խորհուրդներ են տալիս Ղուկասյանին, բացի «պետական» բժիշկներից: Իսկ այն շեղումները, որ, բժիշկների կարծիքով, առաջացել են Ղուկասյանի առողջական վիճակում, այս պահին նրա կյանքին չեն սպառնում:

Ինչ վերաբերում է պետության կողմից Ղուկասյանին հատկացված բժիշկներին վստահել-չվստահելուն, ապա Արմեն Գրիգորյանը մի օրինակ բերեց, ըստ որի` երբ իրենք են չափում Անդրիաս Ղուկասյանի ճնշումը, այն լինում է 110-80 միջակայքում, իսկ երբ չափում են «պետական» բժիշկները, ինչպես ասաց Գրիգորյանը, ապա ցույց է տալիս 80-60 արդյունքը:

«Ուստի մենք սկսում ենք չվստահել նրանց: Դրա համար էլ ունենք մեր բժիշկները եւ նրանց հետ քննարկելով համապատասխան քայլեր ենք անում»,- ասաց Գրիգորյանը: