Անդրիաս Ղուկասյանը Անդերսենի հեքիաթի երեխան է

Քաղաքագետների միության նախագահ  Հմայակ Հովհաննիսյանն այս ընտրությունները մրցակցային չի համարում: Ըստ նրա` նախընտրական շրջանն անցնում է վախի և սարսափի մթնոլորտում:

Yerkir.am-ի հետ զրույցում, անդրադառնալով Քաղաքագետների միության անդամ, նախագահի թեկնածու Անդրիաս Ղուկասյանի հացադուլին, Հովհաննիսյանն ասաց, որ իրենք, որպես քաղաքագետներ, համարում են, որ վերլուծաբանը պետք է ընտրի պայքարի այն ձևը, որը կլինի արդյունավետ, բայց` ոչ հացադուլը:

«Մարդիկ խոսում են սերնդափոխության մասին, սակայն չեն հասկանում, որ Անդրիասը բնավ չի զիջում մյուս թեկնածուներին: Գուցե  այդ հացադուլը յուրահատուկ ճիչ է մի իրավիճակում, երբ այլ ելք չկա: Անդրիասը Անդերսենի հեքիաթի երեխան է, ով ասում է` թագավորը մերկ է»,- ասաց նա:

Yerkir.am-ի հարցին, թե ինչ ընտրություն է կատարելու ինքը` Հովհաննիսյանը, նա պատասխանեց. «Ես  գնալու եմ ընտրության և կատարեմ իմ քաղաքացիական պարտքը, սակայն ջնջելու եմ բոլոր թեկնածուների անունները  և քվեաթերթիկը ցույց եմ տալու լրագրողներին»: