Մենաշնորհներն ազդում են նաեւ քաղաքականության վրա

Տնտեսական մրցակցության իրական պայմանների ապահովումը այսօր Հայաստանի Հարապետության տնտեսության կարեւորագույն եւ առաջնային խնդիրներից մեկն է. այսօր, ներկայացնելով «Ֆրիդրիխ Էբերտ» հիմնադրամի աջակցությամբ, «Հրայր Մարուխյան» հիմնադրամի կատարած` «Մենաշնորհները Հայաստանում» թեմայով ուսումնասիրությունները, նշեց «Հրայր Մարուխյան» հիմնադրամի տնօրեն Մարիա Թիթիզյանը:

Ըստ նրա` այսօր Հայաստանում բազմաթիվ տնտեսվարողներ տուժում են մենաշնորհների առկայության պատճառով, ուստի հարկավոր էր ուսումնասիրել այս խնդրի հաղթահարման միջազգային փորձը եւ, հայաստանյան իրողությունների հետ համադրելով, այն, առաջարկել համապատասխան դեղատոմսեր` հիմնախնդրի լուծման համար:

Իսկ «Ֆրիդրիխ Էբերտ» հիմնադրամի տարածաշրջանային գրասենյակի ներկայացուցիչ Մայքլ Ուայնխարդը նշեց, որ մենաշնորհների խնդիրը կարեւոր է աշխարհի տարբեր երկրներում, այդ թվում` նաեւ իր երկրում` Գերմանիայի Դաշնային Հանրապետությունում:

Նա հիշեց անցյալ տարվա նմանատիպ ուսումնասիրությունները, որի շրջանակներում ինքը հանդիպել էր Հայաստանի գործատուների միության նախագահի հետ, իսկ վերջինս էլ նրան բացատրել էր, թե ինչ խոչընդոտներ կան Հայաստանում մենաշնորհների խնդիրների կարգավորման ճանապարհին:

Ուսումնասիրությունն անդրադառնում է նաեւ մենաշնորհների կարգավորման գերմանական փորձին, թե ինչպես են կարգավորվել տնտեսությունը մի քանի հոգու ձեռքում կենտրոնանալու հարցերը: «Ֆրիդրիխ Էբերտ» հիմնադրամի տարածաշրջանային ներկայացուցիչը, խոսելով «Մենաշնորհները Հայաստանում» ուսումնասիրության մասին, հիշեցրեց, որ մենաշնորհների բացասական հետեւանքների դեմ պայքարը կարեւոր է ոչ միայն շուկա նոր մուտք գործող գործատուների համար, այլեւ, ինչպես Գերմանիայի փորձն է ցույց տվել, շատ կարեւոր է շուկայական տնտեսության կայացման գործում մրցակցային դաշտ ապահովելու համար:

Նա նշեց, որ մենաշնորհներն ունեն այլ հետեւանքներ եւս` շուկայում գնորդների եւ վաճառողների հարաբերությունների առումով, քանի որ այդ դեպքում շուկայում չի գործում առաջարկ-պահանջարկ սկզբունքը, այլ առկա են մենաշնորհատերերի պայմանավորվածությունների եւ այլ սկզբունքներ:

Մայքլ Ուայնխարդի հավաստմամբ`մենաշնորհները, բացի տնտեսական հարաբերություններից, ազդում են նաեւ քաղաքականության վրա, քանի որ մենաշնորհատերերը, փորձելով պահպանել իրենց դիրքը, տարբեր ուղիներ են փնտրում` ազդելու երկրի քաղաքական կյանքի վրա:

«Մենք գիտենք, որ քաղաքական ուժերին պետք է ոչ միայն քաղաքական տարրերի աջակցությունը, այլեւ այս կամ այն հիմնարկների աջակցությունը»,- նշեց նա: