Աշոտյանը սթրես չի տանի, եթե նախարար չլինի

Իր հետագա պաշտոնավարման հարցը կրթության եւ գիտության նախարար Արմեն Աշոտյանը քաղաքական կարեւորագույն հարցերից չի համարում, բայց Yerkir.am-ի հետ զրույցում, այդուհանդերձ, պատասխանեց այդ հարցին:

«Եթե խոսքը գնում է նախարար եղած իմ չորս տարիների աշխատանքի մասին, ապա կարող եմ ասել, որ այն, ինչ կարողացել եմ անել, արել եմ, բայց էլի ունեմ ռեզերվ` հարկ եղած դեպքում կրկին աշխատելու: Իսկ առհասարակ իմ քաղաքական ճակատագիրն անբաժանելի է իմ կուսակցության քաղաքական ճակատագրից»,- հայտարարեց նա:

Դիտարկմանը, թե ի՞նչ է կարծում` կմնա՞ նախարար, Աշոտյանը պատասխանեց, որ այնքան գործ ունի, որ բացարձակապես չի ֆիքսվել սահմանադրական այն գործընթացի վրա, որը ենթադրում է կառավարության հրաժարական, վարչապետի նշանակում, նոր կառավարության կազմ: Եթե կրկին նախարար չդառնա, վստահեցնում է` այդ փաստը ծանր չի տանի, սթրեսի մեջ չի ընկնի:

«Եթե ես չլինեմ նախարար` առաջին պարտավորությունս կլինի այն, որ ինձ հաջորդողին փոխանցեմ իմ կուտակած ամբողջ փորձը, գիտելիքը, տեղեկատվությունը եւ հարկ եղած դեպքում հնարավորինս օգտակար լինեմ նրա աշխատանքին»,- հայտարարեց Աշոտյանը:

Նաեւ շեշտեց, որ ՀՀ կառավարության կազմում լինելը պատիվ է, պատիվ է մեր երկրում ԿԳ նախարար լինելը, եւ ինքը պատվով է կատարում այդ առաքելությունը: «Միաժամանակ, կարծում եմ, որ ես կարող եմ դրսեւորվել քաղաքական ճակատի ցանկացած հատվածում, որտեղ որ հարկ կհամարի իմ կուսակցությունը»,- հայտարարեց Աշոտյանը: