Ավարտվել է նետաձգության Հայաստանի առաջնությունը

Ավարտվել է փետրվարի 1-ից 4-ը ընթացող նետաձգության Հայաստանի առաջնությունը (ձմեռային՝ 18մ+18մ), որը տեղի է ունեցել Էջմիածին քաղաքում:

Առաջնությանը մասնակցել է 58 մարզիկ՝ 25 աղջիկ և 33 տղա: Մասնակիցները հիմնականում ներկայացել են Երևան և Էջմիածին քաղաքները: Այս առաջնությունում մարզիկների ցույց տված արդյունքները նրանց հնարավորություն կտան համալրելու Հայաստանի նետաձգության ազգային հավաքականը և մասնակցելու աշխարհի ու Եվրոպայի առաջնություններին: 

Անդրանիկ Շահազիզյանի սաներ Վասիլ Շահազիզյանը և Գոհար Շահազիզյանը դարձել են են մրցաշարի հաղթողներ: Երկրորդ տեղը գրավել են Բորիս Վասիլյանի սաներ Արշակ Պետրոսյանը և Ռոզա Գրիգորյանը, իսկ Վարդան Ադամյանի սաներ Վիգեն Սմբատյանը և Գոհար Հակոբյանը զբաղեցրել են երրորդ հորիզոնականը: Մրցաշարի գլխավոր մրցավար էր միջազգային կարգի մրցավար Վարդան Շանոյանը:

Ինչպես տեղեկացրեց Հայաստանի հավաքականի գլխավոր մարզիչ Բորիս Վասիլյանը,  հավաքականի անդամներ Գոհար Շահնազարյանը, Արշակ Պետրոսյանը և Նունե Վասիլյանը փետրվարի 26-ից մարտի  2-ը մասնակցելու են Լեհաստանի Ժեշով քաղաքում կայանալիք Եվրոպայի ձմեռային առաջնությանը: