Կանցկացվի Վլադիմիր Ենգիբարյանի անվան հուշամրցաշար

Երևանի Սուրբ  Սարգիս եկեղեցում փետրվարի 3-ին տեղի ունեցավ Հայաստանի  բոլոր ժամանակների լավագույն բռնցքամարտիկ Վլադիմիր Ենգիբարյանի  հոգեհանգստյան արարողությունը: Օլիմպիական չեմպիոնի  հիշատակը հարգելու էին  եկել մայրաքաղաքի և մարզերի  տարբեր բնագավառների  ներկայացուցիչներ: 

Խնկարկման արարողությանը ներկա էին  նաև ՀԱՕԿ նախագահ Գագիկ Ծառուկյանը, ՀՀ սպորտի և երիտասարդության հարցերի նախարար Հրաչյա Ռոստոմյանը, մարզական կառույցների ղեկավարներ, բնագավառի վետերաններ, լրագրողներ:

Արարողությունից անմիջապես հետո  անակնկալ հայտարարությամբ հանդես եկավ  ՀԱՕԿ փոխնախագահ, բռնցքամարտի եվրոպական ասոցիացիայի գործկոմի անդամ Դերենիկ Գաբրիելյանը: «Բարեկամնե'ր, հայտնի է, որ Երևանում անցկացվում է բռնցքամարտի` ՀԱՕԿ  նախագահ  Գագիկ Ծառուկյանի  անվան մրցանակների միջազգային  ավանդական խաղարկություն: Ի լուր բոլորի ցանկանում եմ հայտնել` այսուհետ  մարզական այդ խոշոր մրցաշարը նվիրվելու է  օլիմպիական  խաղերի, ԽՍՀՄ  և Եվրոպայի բազմակի չեմպիոն Վլադիմիր Ենգիբարյանի հիշատակին: Այդ միջոցառումը կլինի ավանդական և կհովանավորվի Գագիկ Ծառուկյանի կողմից»,- ասաց նա: