Հայ արտադրողները ԵՄ շուկա դուրս գալու հնարավորություն կստանան

ԱՊՀ անդամ երկրների հետ Հայաստանն ունի ազատ առեւտրի արդեն գործող ռեժիմ, նույնպիսի համաձայնություն ձեռք բերելու պրոցեսներ են այժմ ընթանում Եվրամիության հետ. այսօր լրագրողներին ասաց էկոնոմիկայի նախարար Տիգրան Դավթյանը:

Նա նշեց, որ այս տարի որոշում կայացվեց, որից հետո սկսվեցին ԵՄ-ի հետ խորը եւ համապարփակ առեւտրի իրականացման շուրջ բանակցություններ, ինչի արդյունքում այս տարի Հայաստանը ԵՄ-ի հետ ունեցել է 3 բանակցություն, իսկ հաջորդ տարի նախատեսվում է ունենալ եւս հինգը, որով ավարտին կմոտենան այս գործընթացները:

«Այսպիսով, սրանով մեր արտադրողներն ու արտահանողները կունենան ազատ առեւտրային մուտք այդ երկու խոշորագույն շուկաներ` ԱՊՀ տարածք ու ԵՄ տարածք, որոնց բաժին է հասնում մեր արտահանումների մոտ 85 տոկոսը»,- ասաց նախարար Դավթյանը:

Ինչ վերաբերում է 2012 թվականին ՏՏ ոլորտին վերաբերող ձեռքբերումներին, ապա Տիգրան Դավթյանը, որպես ամենակարեւոր ձեռքբերում, նշեց վարչապետի վերջին այցի արդյունքները ԱՄՆ. կնքվել են ՏՏ ոլորտին վերաբերող 4 պայմանագրեր այս ոլորտի աշխարհում առաջատար 4 ընկերությունների հետ: Այս ոլորտի դինամիկան նախարարը գնահատեց դրական եւ նշեց, որ աճի բարձր տեմպեր են նախատեսվում հաջորդ տարի: