Սերժ Սարգսյանը փորձում է նմանվել Պուտինին

Սերժ Սարգսյանն իր պաշտոնավարման ողջ ընթացքում այդպես էլ առանձին ասուլիս չի հրավիրել ու լրագրողների հետ նման ձևաչափով չի շփվել: Սա ուշագրավ է այն առումով, որ նա իր բոլոր գործողություններում, անգամ հագուկապով, փորձում է նմանվել ՌԴ նախագահ Վլադիմիր Պուտինին, որը տարեկան առնվազն մեկ անգամ մեծ ասուլիս է անցկացնում. գրում է «Ժողովուրդը»:

Ինչո՞ւ Ս. Սարգսյանն ասուլիս չի հրավիրում: «Ժողովուրդ»-ի այս հարցին ՀՀ նախագահի մամուլի խոսնակ Արմեն Արգումանյանը պատասխանել է. «ՀՀ նախագահը պաշտոնավարման ընթացքում, մասնավորապես` վերջին տարիներին, մի քանի տասնյակ ասուլիսներ ու հարցազրույցներ է ունեցել ինչպես հայաստանյան, այնպես էլ օտարերկրյա լրագրողների մասնակցությամբ: Նկատի ունենալով առաջիկա նախագահական ընտրությունները` կարծում եմ ասուլիսներն և հարցազրույցներն ավելի հաճախակի կլինեն»:

Թերթը նշում է, որ նշված ասուլիսները տեղի են ունեցել օտարերկրյա հյուրերի հետ միասին, և դրանց ընթացքում մեկ-երկու «ազատ, բայց պատասխանատու» լրատվամիջոցի ներկայացուցչի է հնարավորություն ընձեռվել` հարց տալու: