Եկել եմ` ցտեսություն ասելու. հրաժեշտի խաղից առաջ Բերեզովսկին հիշեց կարիերայի ամենահիշարժան պահը

Քիչ առաջ Երևան ժամանեց ֆուտբոլի Հայաստանի հավաքականի դարպասապահ Ռոման Բերեզովսկին: Նա պատրաստվելու է Հայաստան-Բելառուս հանդիպմանը, որը լինելու է մեր հավաքականի սիրված դարպասապահի հրաժեշտի խաղը:

«Ինձ համար հավաքականն այնքան հարազատ է, ինչպես մոր համար իր երեխան»,- «Զվարթնոց» օդանավակայանում լրագրողների հետ զրույցում նշեց Բերեզովսկին:

«Արդյոք տեսնու՞մ է իրեն փոխարինողի» հարցին, դարպասապահը պատասխանեց. «Մեր տղերքը լավ տղերք են, ինձ փոխարինողներ կլինեն: Կուզենայի իմ փորձը փոխանցել ապագա դարպասապահներին, բայց չգիտեմ` դեռ ոնց»:

Բերեզովսկին ֆուտբոլային կարիերայի դրվագներից առանձնացրեց Հայաստան-Սլովակիա խաղը, երբ մեր հավաքականը  0:4 հաշվով հաղթեց սլովակներին:

Հարցին, թե ապագայում իրեն տեսնո՞ւմ է որպես հավաքականի մարզիչ, նա պատասպանեց. «Ամեն ինչ հնարավոր է: Ճիշտն ասած` ես հիմա պոտենցիալ փորձառու մարզիչ չեմ, նոր եմ սկսել զբաղվել այդ գործով»:

Անդրադառնալով Բելառուսի հավաքականի հետ սպասվելիք խաղին` Բերեզովսկին նշեց, որ դեռ չգիտի` երկու խաղակեսերին կկարողանա՞ դաշտում խաղալ, թե՞ ոչ, քանի որ այնքան էլ պատրաստ չէ:

Խոսելով ֆուտբոլային կարիերան ավարտելու մասին՝ Բերեզովսկին նշեց. «Ինձ համար շատ դժվար է, ես միշտ Հայաստան եմ եկել` որպես սպորտսմեն, իսկ այսօր եկել եմ, որ ցտեսություն ասեմ ու շնորհակալություն հայտնեմ Հայաստանի հավաքականի ֆուտբոլիստներին»:

Մանրամասները՝ yerkir.am-ի տեսանյութում: