Չի բացառվում, որ մինչև 2015-ը շատ այլ պետություններ կճանաչեն Ցեղասպանությունը

Ցեղասպանության 100-րդ տարելիցին ընդառաջ հնարավոր է` մեծ թվով պետություններ ճանաչեն Հայոց ցեղասպանությունը. այսօր, լրագրողների հետ հանդիպման ժամանակ ասաց ՀՅԴ Բյուրոյի Հայ դատի և քաղաքական հարցերի գրասենյակի պատասխանատու Կիրո Մանոյանը:

«Չի բացառվում, որ մինչև 2015 թվականը բազմաթիվ պետություններ կճանաչեն Հայոց ցեղասպանությունը, հատկապես` այն պետությունները, որոնք մինչև օրս Հայոց ցեղասպանությունը չեն ճանաչել ոչ թե նրա համար, որ չեն ընդունում իրողությունը, այլ նրա համար, որ չեն ցանկացել իրենց հարաբերությունները փչացնել Թուրքիայի հետ»,- նշեց նա:

Խոսելով 2012-ին Հայոց ցեղասպանության ճանաչման հարցում ձեռքբերումների մասին՝ Մանոյանն ընդգծեց, որ եթե մինչ այդ բարձրացվում էր Հայոց ցեղասպանության ճանաչման և դատապարտման հարցը, ապա այս տարի նաև ակտիվացավ հատուցման, հետևանքների վերացման հարցը, որը պետք է մինչև վերջ պնդել: