Տնօրենների մեծ մասը հավաստիացնում է, թե դպրոցներում բռնություն չկա

Արդեն երեք տարի է, ինչ ՀՀ ԿԳ նախարար Արմեն Աշոտյանի հրամանով հատուկ հանրակրթական ուսումնական հաստատություններում  հասարակական դիտորդների կողմից մշտադիտարկում է իրականացվում: Այս տարվա մշտադիտարկման արդյունքների ամփոփման ժամանակ Արմեն Աշոտյանը նշեց, որ բարձրացված հարցերը հաջորդ տարի լուծվելիք առաջին խնդիրներից մեկը կլինեն:

«Խումբն արձանագրել է որոշակի խնդիրներ, սակայն բոլոր խնդիրները պետությունը միանգամից լուծել չի կարող, բայց պետք է անեն ամեն ինչ՝ լուծելու ֆինանսական, հատուկ հաստատություններում ոչ թիրախային երեխաների ընդգրկվածության, գիշերելու, թե չգիշերելու խնդիրները»,- ասաց նախարարը եւ հավելեց, որ յուրաքանչյուր երեխա առանձին ճակատագիր է, եւ պետության պարտավորությունն է ապագայում նրան բարեկեցիկ եւ արժանավայել կյանքի հնարավորություն տալ:

«Բաց հասարակության հիմնադրամներ» հայաստանյան կենտրոնի տնօրեն Լարիսա Մինասյանն էլ նշեց, որ իրենք միացել են մշտադիտարկման խմբին՝ փակ հաստատություններում գտնվող անձանց իրավունքների պաշտպանությանը խթանելու համար: «Մենք աջակցել ենք խմբին՝ տրամադրելով սկզբից 85 000 դոլար, իսկ հետո հավելյալ 10 800 դոլար: Խումբը պետք է կարողանա վերհանել իրավունքի եւ կրթության հարցերը՝ շեշտը դնելով հենց այստեղ առկա խնդիրների վրա»,- ասաց նա:

Մշտադիտարկման խմբի նախագահ Արտակ Կիրակոսյանը հայտնեց, որ դպրոցների ֆինանսական պայմանները չեն բավարարում երեխաների համար անգամ լիարժեք սանիտարահիգիենիկ պայմաններն ապահովելուն: Նա նշեց, որ պետք է կարգավորել ֆինանսների կառավարման հարցը եւ, ամենակարեւորը, ըստ աշակերտի ֆինանսավորմանը պետք է փոխարինի մեկ այլ մեթոդ`ֆինանսավորում ըստ ծառայությունների:

«Երկրորդ խնդիրը բռնության հարցն էր. չնայած այն հանգամանքին, որ երեխաները խոսում են բռնության տարբեր ձեւերի մասին, որոնց առնչվում են, բայց, մեկ է, տնօրենները չեն ընդունում դրանք: Կարեւոր է ոչ թե մերժողական կեցվածք ընդունել, այլ բարձրաձայնել բռնությունների մասին եւ լուծումներ փնտրել»,- ասաց Կիրակոսյանը: