Ասլամազյան քույրերի պատկերասրահը օբյեկտ չի դառնա

Օրերս քննարկման բուռն թեմա էր դարձել Գյումրիի Ասլամազյան քույրերի թանգարան-պատկերասրահի առաջին հարկի ճակատագիրը:

Ըստ շրջանառվող լուրերի` պատկերասրահի առաջին հարկը, Գյումրու քաղաքապետի որոշմամբ, հատկացվել է ինչ-որ կազմակերպության, և այն վերանորոգումից հետո ծառայելու է որպես բանկ:

Այսօր տեղում իսկությունը պարզելու նպատակով shirakcentre.org-ի լրագրողն այցելել է պատկերասրահ: Իսկապես, առաջին հարկի սրահների նկարները և այլ ցուցանմուշներ տեղափոխվել էին երկրորդ հարկ: Առաջին հարկամասը պատով առանձնացվել և փակ էր, իսկ բակում մի ամբողջ մեքենա տուֆ կար:

Պատկերասրահի տնօրեն, Գյումրու նկարիչների միության նախագահ Գարիկ Մանուկյանը կտրականապես հերքեց երկհարկանի պատկերասրահի առաջին հարկը մեկ այլ նպատակով օգտագործելու մասին լուրը` ավելացնելով, որ Գյումրու քաղաքապետ Վարդան Ղուկասյանը դեռ վաղուց էր խոստացել վերանորոգել շենքը և հիմա, օգտագործելով ցուցահանդեսների միջև ընկած դադարը, կատարում է խոստումը:

Ի դեպ, Ասլամազյան քույրերի թանգարան-պատկերասրահի տնօրենի տեղեկացմամբ, նախորդ օրը ուշ երեկոյան նույն խնդրով հետաքրքրվել են նաև ՀՀ մշակույթի նախարարությունից:

«Մենք նույն քաղաքում ենք ապրում, երես երեսի ենք հանդիպելու, թաքցնելու բան չէ, որ ծածուկ պահենք»,- ասել է պարոն Մանուկյանը: