Թուրքիան Ադրբեջանի պատանդն է

Հայ-թուրքական հարաբերություններում որևէ տեղաշարժ չկա և մոտ ապագայում էլ չի ակնկալվում. այսօր լրագրողների հետ հանդիպման ժամանակ ասաց թուրքագետ Հակոբ Չաքրյանը:

Նրա համոզմամբ`  հայ-թուրքական արձանագրություններն ի սկզբանե չէին լինի, Սերժ Սարգսյանն էլ Աբդուլլահ Գյուլին չէր հրավիրի ֆուտբոլային խաղը դիտելու, եթե միջազգային հանրության ճնշումը չլիներ:

Անդրադառնալով թուրքական խորհրդարանի կողմից արձանագրությունների քննարկմանը` Հակոբ Չաքրյանը նշեց, որ մոտ ապագայում Թուրքիայի խորհրդարանը չի անդրադառնա դրանց: «Նրանց օրակարգը ծանրաբեռնված է նոր սահմանադրության մշակմամբ»,- ասաց թուրքագետը` հավելելով նաեւ, որ Ադրբեջանն այդ հարցում Թուրքիային կարծես, պատանդ է վերցրել:

«Թեև հայ-թուրքական հարաբերություններում իր դերակատարությունն ունի Ղարաբաղյան հիմնահարցը, միաժամանակ ակնհայտ է նաև, որ Թուրքիան չի ցանկանում, որ Հայաստանը ոտքի կանգնի»,- նշեց նա:

Միջազգային հանրության շահագրգռվածությունը հայ-թուրքական հարաբերությունների կարգավորման հարցում այս փուլում որեւէ արդյունք չի տա: «Թուրքիան սակարկելու շատ բան ունի, քանի որ եթե Թուրքիայից պահանջում են հայերի հետ հարաբերությունների կարգավորում, ապա Թուրքիան էլ Սիրիայի հարցում այլ բան կպահանջի»,- ասաց բանախոսը: