Թուրքիան Ադրբեջանի երեք քաղաքներում ավիաբազաներ կստեղծի. էլ ո՞ր երկրներում Թուրքիան ունի ռազմաբազաներ

Թուրքիան ավիաբազաներ է ստեղծում Ադրբեջանի երեք քաղաքներում՝ Գյանջայում, Լենքորանում և Գաբալայում: Այս տեղեկությունը տարածում են թուրքական լրատվամիջոցները:

Ասվում է, որ Ադրբեջանը Սիրիայի, Քաթարի, Իրաքի, Սուդանի և Հյուսիսային Կիպրոսի հետ կարող է դառնալ այն երկիրը, որտեղ կտեղակայվեն թուրքական ռազմաբազաներ:

Թուրքիան աշխարհի տարբեր մասերում ռազմաբազաներ կամ ռազմական առաքելություններ ունի: Այսպես՝

Սիրիայում. հակաահաբեկչության պատրվակով Սիրիայի հյուսիսային մի շարք շրջաններ բռնազավթած Թուրքիան, բացի ահաբեկիչներին ֆինանսավորելուց, ունի նաև ռազմական ներկայություն:

Իրաքում. թուրքական բանակի ստորաբաժանումները տեղակայված են այս երկրի հյուսիսային տարբեր քաղաքներում, որոնք մասնակցում են PKK-ի դեմ  գործողություններին:

Սոմալիում. այստեղ թուրքական բանակը երկու խնդիր ունի: 2017-ին Սոմալիի բանակի անձնակազմ պատրաստելու համար Մոգադիշոյում տեղակայվեց թուրքական ուժերի հրամանատարությունը: Երկրորդ առաքելությունը կապված է «ծովահենների հարձակումներից նավերի պաշտպանության հետ»:

Լիբանանում. ՄԱԿ-ի ժամանակավոր առաքելության կազմում այստեղ ներկա են թուրք զինվորներ: Տասը տարուց ավելի շուրջ հարյուր թուրք զինվորականներ ներկա են եղել այս երկրում:

Քաթարում. Թուրքիան 2017 թվականից մշտական ռազմակայան ունի:

Բոսնիա և Հերցեգովինայում. Թուրքիայի զինված ուժերը գործում են որպես Բոսնիա և Հերցեգովինայում տեղակայված միջազգային խաղաղապահ ուժեր:

Աֆղանստանում. թուրքական բանակը գործում է այստեղ ՆԱՏՕ-ի առաքելության շրջանակներում՝ Աֆղանստանում սեպտեմբերի 11-ի ահաբեկչությանն ի պատասխան ռազմական գործողություններից հետո։ Թուրք զինվորականների թիվը Աֆղանստանում շուրջ 2 հազար մարդ է:

Ալբանիայում. 1997-ին Ադրիատիկի ափին գտնվող Ավլոնիա քաղաքում տեղակայված ռազմաբազայում ծառայում է մինչև 250 անձնակազմ:

Հյուսիսային Կիպրոսում. Կիպրոսի բռնազավթված հյուսիսում թուրք զինվորականների թիվը գնահատվում է 40 հազար: Թուրքիայի ռազմական ներկայությունը Կիպրոսում ունի մշտական զորամասի կարգավիճակ, որն անմիջականորեն ենթակա է Թուրքիայի գլխավոր շտաբին:

Սուդանում. 2017-ին նախագահ Էրդողանի՝ այս երկիր կատարած այցից հետո Սևակին կղզում որոշվել է 99 տարով ռազմաբազա տեղակայել:

Կենտրոնական Աֆրիկայի Հանրապետությունում. Թուրքիայի զինված ուժերը գործում են այս երկրում ՄԱԿ-ում ինտեգրման և կայունության բազմակողմ առաքելության շրջանակներում:

Մալիում. թուրք զինվորականները ակտիվ են այս երկրում՝ Բազմակողմանի ինտեգրման և կայունության առաքելության շրջանակներում: