Թուրքիան շարունակում է ապակառուցողական դիրքորոշում ցուցաբերել. ՀՀ ԱԳՆ

ՀՀ արտգործնախարար Էդվարդ Նալբանդյանն այսօր խորհրդարանում մեկնաբանել է Թուրքիայի արտգործնախարար Ահմեդ Դավութօղլուի հայտարարությունը, թե երկրաշարժից հետո Հայաստանի կողմից ցուցաբերված օգնություն չի կարող ազդել հայ-թուրքական հարաբերությունների կարգավորման վրա:

«Այդ հայտարարությունը մեկ անգամ եւս ցույց է տալիս, որ թուրքական կողմը շարունակում է այն ապակառուցողական դիրքորոշումը, որը դրսեւորել է Ցյուրիխից հետո եւ շարունակում է դրսեւորել»,- ասաց արտգործնախարարը:

ՀՀԿ-ական  պատգամավոր Գագիկ Մինասյանը հետաքրքրվեց, թե ո՞րն է ԱՄՆ-ի լավատեսության պատճառը, եթե թուրքական դիրքորոշումը փոփոխություն չի կրում: Էդվարդ Նալբանդյանը ի պատասխան նշեց, որ դիվանագիտության մեջ միշտ պետք է լավատես լինել: «Մենք էլ, չնայած թուրքական կողմի ապակառուցողական մոտեցումներին, հույս ենք հայտնում, որ պետք է կարգավորել հարաբերությունները եւ այդ ուղղությամբ շարունակել ջանքերը»,- ասաց նա: