Անկարգությունների հրահրման համար մեղավոր են «ապակառուցողական քաղաքական ուժերը». Վրաստանի վարչապետ

Բաթումիում ձերբակալվել է 40 մարդ, ովքեր մասնակցել են անկարգությանը, այս մասին հայտնել է Վրաստանի ՆԳՆ ղեկավար Գեորգի Մգեբրիշվիլին: Այժմ քաղաքում կարգ ու կանոնը վերականգնել են կարողացել: Ոստիկանական և հրշեջ մեքենաներ են մոբիլիզացվել: Ըստ ՆԳՆ-ի՝ Բաթումիի քաղաքապետարանը հաշվում է քաղաքի ենթակառուցվածքին հասցված վնասը:

«Հատուկ գործողությունների արդյունքում ձերբակալվել է 40 մարդ, նրանց անձը պարզվում է: Անկարգությունների մասնակիցները և կազմակերպիչները, անգամ շատ քիչ կապ ունեցողնեւրը կպատժվեն օրենքի ամբողջ խստությամբ»,- լրագրողներին ասել է նախարարը: Մգեբրիշվիլին բոլորին կոչ է արել տանը մնալ և չգնալ Բաթումիի կենտրոն:

Աջարիայի առողջապահության նախարար Զաալ Միքելաձեն լրագրողներին հայտնել է, որ Բաթումիի հիվանդանոցներ է դիմել 33 տուժած, այդ թվում՝ 15 ոստիկան: Ըստ նախարարի՝ խոսքը թեթև թունավորման մասին է և, ոմանք էլ ունեն միջին ծանրության վնասվածքներ: Բոլորի վիճակը կայուն է:

Հիշեցնենք, որ անկարգությունների պատճառ է դարձել ոստիկանների վարքը, վերջիններս տեղի բնակչի են տուգանել: Ականատեսների խոսքով՝ իրավապահները վիրավորել են տղամարդուն, ինչի հետևանքով նրան պաշտպանել են մոտակայքում գտնվող մարդիկ,եղածը ծեծկռտուքի է հանգեցրել, ինչից հետո մի քանի մարդ է ձերբակալվել: Որոշ ժամանակ անց Աջարիայի Ներքին գործերի գլխավոր վարչության շենքի հարևանությամբ մոտ 1 000 մարդ է հավաքվել: Նրանք պահանջել են պաշտոնանկ անել պարեկային ոստիկանության նոր ղեկավար Մալխազ Բատիաշվիլիին: