Հայաստանում 4000 երեխա է ապրում մանկատներում

Ներկայումս Հայաստանում մոտ 4000 երեխա ապրում է մանկատներում եւ գիշերօթիկ դպրոցներում, որոնց ավելի քան 80 տոկոսն ունի առնվազն մեկ ծնող. լրագրողների հետ հանդիպման ժամանակ ասաց ՅՈՒՆԻՍԵՖ-ի հայաստանյան գրասենյակի հաղորդակցման ծրագրերի ղեկավար Էմիլ Սահակյանը:

Նրա խոսքերով` Հայաստանում մանկատները եւ հատուկ գիշերօթիկ դպրոցներն անհամապատասխան վայր են երեխաների ապրելու համար: «Կարծում եմ, որ հարցը կլուծվի այն ժամանակ, երբ կստեղծվեն խնամատար ընտանիքներ»,- ասաց նա` հավելելով, որ Հայաստանում նախատեսվում է ստեղծել 25 խնամատար ընտանիք, որտեղ էլ կմեծանան ծնողազուրկ երեխաները:

«Ռոլան Բիկով» հիմնադրամի տնօրեն Նունե Մանուկյանն էլ տեղեկացրեց, որ Մանկապատանեկան ֆիլմերի փառատոնն այդ ծրագրի շրջանակներում ավելացրել է «Ես ունեմ իրավունքներ» անվանակարգը, որտեղ ցուցադրվող ֆիլմերը պատմում են երեխաների իրավունքների մասին: