Մի երկինք, տարբեր մշակույթներ

Հայաստանում ԻԻՀ մշակույթի օրերի շրջանակներում` Երեւանի քաղաքապետարանի «Հայ-Արտ» մշակութային կենտրոնում, տեղի ունեցավ Հայ-իրանական բարեկամությունը խորհրդանշող ցուցահանդես:

Ցուցահանդեսին ներկայացված են իրանցի գեղանկարիչների եւ ժողովրդական վարպետների` կոլաժիստ Գոլբահար Հայաթի, փայտագործ եւ մանրանկարիչ Մոստաֆա Արյաֆարի, լուսանկարիչ Օշին Զաքարյանի, գեղանկարիչ Նադեր Սայարի 100-ից ավելի աշխատանքներ:

Մշակույթի փոխնախարար Արթուր Պողոսյանի խոսքերով` հայ-իրանական բարեկամությունը խորհրդանշող միջոցառումներ են անցկացվել նաեւ Մեղրիում եւ Սյունիքի մարզում. «Մյուս տարի նախատեսում ենք Սյունիքի մարզին կից իրանական մարզում անցկացնել հայկական մշակութային օրեր»:

Իրանահայ լուսանկարիչ Օշին Զաքարյանը, ով ցուցահանդեսին մասնակցում է իր 30 լուսանկարներով, մասնագիտությամբ աստղալուսանկարիչ է: Yerkir.am-ի հետ զրույցում նա ասաց, որ փորձում է գիշերով նկարել աշխարհի տարբեր ազգերի մշակութային կոթողները` նույն համաստեղությունների ներքո:

«Սա մի ճանապարհ է, որ ցույց է տալիս նույն երկնքի տակ ապրող տարբեր ազգերի մշակույթները: Ես շատ ուրախ եմ, որ մշակույթի միջոցով ճանապարհներ են բացվում երկու ժողովուրդների բարեկամության համար»,- ասաց լուսանկարիչը `հավելելով, որ ցանկանում է լուսանկարել Հայաստանի մշակութային բոլոր հին կոթողները:

Զաքարյանը հույս ունի, որ ապագայում ցուցահանդեսով հանդես կգա Հայաստանում:

Քանդակագործ Հերիքնազ Գալստյանը, ով ապահովել է ցուցահանդեսի դիզայնը, համարում է, որ իրանցիները հարուստ մշակույթ ունեն. «Այսպիսով` սկսում ենք լավ ճանաչել միմյանց»:

Ցուցահանդեսը կտեւի մինչեւ հոկտեմբերի 11-ը:

Սաթենիկ ՄԵԼՔՈՆՅԱՆ