ՀԱԿ-իշխանություն ամենալուրջ թեման` զուգարանի խնդիրը

ՀԱԿ-ի ներկայիս քայլերը ԱԺ «Ժառանգություն» խմբակցության ղեկավար Ստեփան Սաֆարյանը դժվար է հասկանում: Yerkir.am-ի հետ զրույցում սա խոստովանելուց հետո խորհրդարանական ընդդիմության ներկայացուցիչը վստահեցրեց, որ «ՀԱԿ-ն էլ է շփոթված»:

Սաֆարյանը չի հասկանում` եթե երկխոսության շարունակականությունը կապված էր Տիգրան Առաքելյանի ազատ արձակման հետ, եւ եթե այսօր երկխոսության առկախման այդ «պատճառն» այլեւս չկա (Տիգրան Առաքելյանը դիմել էր Լեւոն Տեր-Պետրոսյանին իր պատճառով երկխոսությունը չդադարեցնելու խնդրանքով), ապա ինչո՞ւ է այսօր ՀԱԿ-ը նստել Ազատության հրապարակում:

Մեր դիտարկմանը, թե արտահերթ ընտրություններ են պահանջում, Սաֆարյանը թերահավատությամբ նշեց. «Հասկանալի չէ, կարծում եմ` ՀԱԿ-ը շփոթվել է, թե ինչ է ուզում: Արտահերթ ընտրություններ նա ուզում էր երկխոսության միջոցով, ասում էր, թե եգիպտական սցենարն իր համար անընդունելի է, իսկ այսօր…»:

Պատգամավորը վստահ է, որ ՀԱԿ-ն այլեւս չի հասկանում, թե ինչ է ուզում: Մի բան, սակայն, ԱԺ «Ժառանգություն» խմբակցության ղեկավարի համար առավել քան հստակ է. «Այսօր ՀԱԿ-իշխանություն ամենալուրջ թեման` զուգարանի խնդիրն է»:

18:30-ին Ստեփան Սաֆարյանը Լեւոն Տեր Պետրոսյանին հարց չի ուղղելու: «Ամեն ինչ պարզ է, դեռ մի բան էլ ավելի»,- հավելեց ընդդիմադիր պատգամավորը: