Ժողովուրդը դարձյալ պետք է մտնի խաղի մեջ

ՀԱԿ համակարգող Լեւոն Զուրաբյանն այսօր լրագրողների հետ հանդիպման ժամանակ հավաստիացրեց, որ Կոնգրեսի` սեպտեմբերի 30-ի հանրահավաքը աննախադեպ ու բեկումնային է լինելու: Նա նշեց, որ ժողովուրդը պետք է դարձյալ ակտիվանա, մտնի խաղի մեջ ու իշխանություններին պարտադրի անհրաժեշտ զիջումներ անել:

Նշելով, որ մինչեւ սեպտեմբերի 30-ը ժամանակ կա, նա հավելեց, սակայն, որ չի կարծում, թե իշխանությունները պատրաստ են որեւէ զիջման: «Նրանք չեն հասկանում, որ լարվածությունը թուլացել է այն պատճառով, որ ժողովուրդը սպասում էր, որ նրա պահանջները կկատարվեին երկխոսության միջոցով, սակայն իշխանությունները սթափ չեն ըմբռնում ստեղծված իրավիճակը: Ուստի գալիս է պահը, երբ ժողովուրդը նորից պետք է մտնի խաղի մեջ եւ իշխանություններին իր ձայնը հասցնի վճռականությամբ եւ կոնկրետ գործողություններով»,- ասաց Զուրաբյանը:

Լրագրողների հարցին` հնարավո՞ր է, արդյոք, որ Կոնգրեսը փոխի իր որոշումն ու շարունակի երկխոսությունը, ՀԱԿ համակարգողը պատասխանեց. «Մենք միշտ էլ ասել ենք, որ երկխոսությունը մեզ համար ինքնանպատակ չէ: Մեր նպատակն է այս ավազապետական, աղճատված, կեղծված ընտրություններից անցնել իրական ժողովրդավարության, եւ եթե երկխոսությունը ծառայի այդ նպատակին, մենք կօգտագործենք երկխոսությունը: Հիմա պարզվում է, որ երկխոսությունը չի ծառայում այդ նպատակին, ուրեմն կանցնենք այլ մեթոդների»:

Թե որո՞նք կլինեն այդ մեթոդները եւ արդյո՞ք սեպտեմբերի 30-ին Կոնգրեսը կգնա ջրբաժանի, Լեւոն Զուրաբյանը չպարզաբանեց` նշելով, որ ամեն ինչ կախված է ժողովրդից, եւ ինքը չի ուզում ժողովրդի անունից որոշում կայացնել:

«Մենք հո չե՞նք ուզում այս իշխանության հետ վարվել այնպես, ինչպես Լիբիայի ժողովուրդը վարվեց Կադաֆիի շրջապատի հետ. նման պլաններ չունենք»,- նշեց Զուրաբյանը` հավելելով, որ իրենք ցանկանում են անցնցում անցում դեպի ժողովրդավարություն, բայց այդ ճանապարհին որոշ մեթոդների կիրառումը եւս չի բացառվում: