Թրամփը Կանադային հարկային մեղմացում է խոստացել, եթե վերջինս մտնի ԱՄՆ-ի կազմի մեջ

ԱՄՆ նախագահ Դոնալդ Թրամփը Կանադային հարկային լուրջ մեղմացումներ է խոստացել այն դեպքում, եթե երկիրն ԱՄՆ-ի կազմ մտնի 51-րդ նահանգի իրավունքով:

«Ես կցանկանայի տեսնել Կանադան որպես 51-րդ նահանգ։ Կանադայի քաղաքացիները, եթե դա տեղի ունենա, կստանան շատ մեծ հարկային մեղմացումներ, քանի որ նրանք այժմ մեծապես ծանրաբեռնված են հարկերով: Դուք ստիպված չեք լինի անհանգստանալ ռազմական և շատ այլ հարցերով: Դուք կունենաք լավագույն բուժօգնությունը, շատ ավելի լավը», - ասել Է Թրամփը լրագրողներին՝ այցով գտնվելով Հյուսիսային Կարոլինայում։

Կանադան ԱՄՆ-ի կազմում ընդգրկելու գաղափարը նախկինում էլ հրապարակայնորեն բարձրացվել էր Թրամփի կողմից, սակայն անփոփոխ մերժվում էր կանադական կողմից, որն ընդգծում էր իր անկախությունն ու ազգային ինքնությունը: