Ժողովուրդը պետք է ապրի ճշմարտության մեջ, արժեքի մեջ, առաքինության մեջ․ Բագրատ Սրբազան

Ինչպե՞ս Աստված կդառնա մեր զորքի հրամանատարը․ հատված՝ Տավուշի թեմի առաջնորդ Բագրատ Սրբազանի քարոզից․

«Ինչպե՞ս անենք, որ Աստված Ինքը դառնա մեր զորքի հրամանատարը․ Իրեն ընդունելով, Իրեն ընտրելով։

Սա չի՛ կարող վերացական լինել․ Աստված մեզ տվել է խելք, միտք, կարողություն, հնարավորություն։

Աստծու՝ մեր կյանքի առաջնորդ լինելն արտահայտվում է մեր վարքագծի միջոցով․ մեր վարքագիծն է լավագույն արտահայտությունը՝ մեր կենսակերպը, կյանքը, միջոցը, եղանակը։

«Երկնքի արքայությունը քո մեջ է» – ասում է մեր Տերը։ Մեր կյանքը, մեր ապրածին համարժեք լինելը՝ դա է ցուցիչը։

Երբ ժողովուրդդ, մեծ իմաստով, ապրում է ստի, կեղծիքի, խաբեության, մեղքերի մեջ, ինչպե՞ս ես պատկերացնում՝ Աստված առաջնորդի։

Մարդը, ժողովուրդը պետք է ապրի ճշմարտության մեջ, արժեքի մեջ, առաքինության մեջ, որ ինքնաբերաբար այդ առաջնորդությունը տեղի ունենա։ Ուրիշ կերպ չի լինում։

Հավատքը վերացական տեսություններ չեն։ Շատ գործնական, կոնկրետ ակտը, գործողությունը վարքագիծն է։

Աստծու առաջնորդությունը միշտ մեր կյանքում է, անբացակա։ Մենք մեր զինվորության մասին պետք է խոսենք․ ոչ թե Իր զորավար լինելու, այլ մեր՝ զինվոր լինելու»։