Ավազակային խմբի անդամները պաշտոնյաների որդիներ են

Այսօր` սեպտեմբերի 23-ի առավոտյան, Մյասնիկյան պողոտայում ոստիկանների կողմից վնասազերծված, ծանր հանցագործությունների մեջ կասկածվող ավազակախմբի անդամների թվում, ըստ yerkir.am-ի ունեցած տվյալների, պաշտոնյաների որդիներ կան: Արդեն համացանցում տարածվել է, որ դրանցից մեկը ՀՔԾ պետի տեղակալ Մարսել Մաթեւոսյանի որդին է:

Քիչ առաջ yerkir.am-ի աղբյուրները տեղեկացրին, որ հայտնի է դարձել ևս մեկ պաշտոնյայի որդու անուն: Այս խմբավորմանը, նախնական տվյալներով, մաս է կազմում նաև Վերաքննիչ քրեական դատարանի  նախագահ Տիգրան Սահակյանի որդին:

Նշենք, որ ավազակախմբի վնասազերծման գործողությունն իրականացվել է ոստիկանության կազմակերպված հանցավորության դեմ պայքարի վարչության աշխատակիցների կողմից` մի քանի ուղղություններով: Ավազակախմբի անդամները ձերբակալվել են:

Yerkir.am-ի ոստիկանության աղբյուրները տեղեկացնում են, որ հենց այս ավազակախումբն է, որը վերջին շրջանում աղմկահարույց ավազակային հարձակումներ էր գործել բարձրաստիճան պաշտոնյաների բնակարանների վրա:

Հիշեցնենք, որ ավազակային հարձակումների էին ենթարկվել «Լինսի» հիմնադրամի ճանապարհաշինության ԾԻԳ-ի նախկին պետ Էդուարդ Բեզոյանի, ԱԺ նախկին պատգամավոր Նապոլեոն Ազիզյանի և  Մալաթիա-Սեբաստիա համայնքի նախկին ղեկավար Աղվան Գրիգորյանի բնակարանների վրա:

Ըստ yerkir.am-ի աղբյուրի` արդեն հայտնաբերվել են գործին առնչվող փաստացի իրեղեն ապացույցներ, մասնավորապես` Նապոլեոն Ազիզյանի բնակարանից ավազակային հարձակմամբ ձեռք բերված իրեր: