Ամփոփվեց "Հայաստանը դու ես" լուսանկարչական աշխատանքների մրցույթը

ՀՀ անկախության 20-րդ տարեդարձին նվիրված «Հայաստանը դու ես» լուսանկարների մրցույթը մեկնարկել է օգոստոսի 29-ին:

Մրցույթին ներկայացված լուսանկարները պետք է արտահայտեին անկախության գաղափարը եւ նվիրված լինեին ՀՀ անկախության 20-րդ հոբելյանին:

Մրցութային 18 օրվա ընթացքում, որոնց մասնակցել են նաեւ արտերկրում ապրող մեր հայրենակիցները, ներկայացվել է 214 լուսանկար: Կազմակերպիչների համար առաջնայինը լուսանկարների բովանդակությունն էր ու ստեղծագործական մոտեցումը, քանի որ այն նախատեսված էր ինչպես պրոֆեսիոնալ, այնպես էլ սիրողական լուսանկարիչների համար: Լուսանկարներում հիմնականում իշխում էր եռագույնը, շատ էին երեխաների մասնակցությամբ լուսանկարները: Պրոֆեսիոնալ ժյուրին ընտրեց երեք լավագույն լուսանկար:

«Հայաստանը դու ես» լուսանկարների մրցույթի մասնակից Նվեր Ղազարյանի համար անկախությունն արտացոլված է եռագույնի երանգներն ընտրած մանկան հայացքում: Հենց նրա լուսանկարն է արժանացել առաջին մրցանակի: Երկրորդ մրցանակին արժանացավ Ռազմիկ Փաշիկյանի լուսանկարը, իսկ երրորդը`Արման Ղարաջանյանն է: Երեք լավագույն լուսանկարի հեղինակները կստանան հավաստագիր եւ հուշանվերներ «Հայաստանը դու ես» կարգախոսով: Հատուկ մրցանակ ու հավաստագիր կստանա նաեւ «Ֆեյսբուք»-ում ամենաշատ հավանություն ստացած լուսանկարի հեղինակ Արմեն Ղազարյանը: