Կոնստանտին Օրբելյանի աճյունն ամփոփվեց հայրենիքում

Այսօր «Արամ Խաչատրյան» համերգասրահում տեղի ունեցավ վերջին հրաժեշտը ԽՍՀՄ և ՀԽՍՀ ժողովրդական արտիստ, կոմպոզիտոր, դիրիժոր, դաշնակահար Կոնստանտին Օրբելյանին: Ողջ ընթացքում համերգասրահում հնչում էին կոմպոզիտորի ստեղծագործությունները: Օրբելյանին հրաժեշտ տվեցին ծափողջյուններով:

Yerkir.am-ի հետ զրույցում ՀՀ կոմպոզիտորների միության նախագահ Արամ Սաթյանը նշեց, որ մենք կորցրինք այնպիսի մի կոմպոզիտորի, ով մինչև վերջին րոպեն մտածում էր մեր արվեստի և հայկական մշակույթի մասին. «Կորցրեցինք մեկին, ով գիտակցում էր արվեստի դերը մեր կյանքում, այս օրերում, ով անում էր ամեն ինչ` հայկական մշակույթն անաղարտ պահելու համար»:

Կոմպոզիտոր Երվանդ Երզնկյանը նշեց, որ Օրբելյանն այնպիսի ստեածագործություններ է գրել, որոնք ընդմիշտ կմնան հայկական երաժշտության գանձարանում: «Նրա գործերը լսում ու կատարում են ոչ միայն Հայաստանում, այլև ամբողջ աշխարհում: Իր երգերի միջոցով` նա միշտ մեզ հետ կլինի»,- ասաց նա:

Օրբելյանի աճյունն ամփոփվեց Կոմիտասի անվան պանթեոնում: