Մեծ Մասրիկն արդեն ջուրն ունի

Վաղուց հնացած և հաճախակի խցանվող խողովակների պատճառով պրոբլեմային դարձած խմելու ջրի խնդիրը լուծվեց. շատ համայնքների պես ջրատար խողովակների նոր ցանց անցկացվեց նաեւ Գեղարքունիքի մարզի Մեծ Մասրիկ գյուղում:

Սակայն նոր ջրագիծը շրջանցում է գյուղական ամբուլատորիան, այնինչ առաջին հերթին ջրով անհրաժեշտ է ապահովել հենց այս հիմնարկությունը` տարաբնույթ հիվանդների և այցելուների հետ ամենօրյա ակտիվ շփման պայմաններում հիգիենայի տարրական կանոնների պահպանման համար:

Ամբուլատորիայի աշխատակիցներն արդեն երկար ժամանակ է` ջուրը դույլերով բերում են մոտակա աղբյուրից, հավաքում մեծ տարայի մեջ, ախտահանում քլորով և նոր օգտագործում: Ծայրահեղ դեպքում բուժանձնակազմն օգտվում է բժշկական սպիրտից` միայն ձեռքերն ախտահանելու համար: Նշենք, որ ամբուլատորիան սպասարկում է ոչ միայն տվյալ համայնքի, այլև հարևան գյուղերի բնակչությանը:

Ինչպես նշում է բժշկուհի Հասմիկ Ղազարյանը, գյուղապետարանն իրենց խոստացել էր ջրի խնդիրը վերջնականապես լուծել. «Մեզ խոստացել են, որ օրերս, առանց վնասելու ճանապարհի ասֆալտը, կլուծվի այդ հարցը»:

Սակայն մինչ այդ բուժանձնակազմը շարունակում է ջուր կրել` սպասելով ջրատար խողովակի անցկացմանը:

Վարդուհի ՄԿՐՏՉՅԱՆ