Տո, լավ են անում` հիմա էլ ջուրն են թանկացնում, շատ էլ ճիշտ են անում

Վաղը Հանրային ծառայությունները կարգավորող հանձնաժողովը նիստ է հրավիրել, որտեղ որոշում է կայացնելու թանկացնել մեծածախ ջրի սակագինը: Նշենք, որ մանրածախ ջրի սակագինը առայժմ անփոփոխ է մնալու բնակիչների համար: Հիշեցնենք նաև, որ օրեր առաջ նույն հանձնաժողովը թանկացրեց էլեկտրաէներգիան բնակիչների համար:

Հերթական թանկացման մասին Yerkir.am-ը զրուցեց ընդդիմադիր քաղաքական գործիչներ` «Ժառանգության» փոխնախագահ Արմեն Մարտիրոսյանի և ՀԱԿ խմբակցության քարտուղար Արամ Մանուկյանի հետ: Նրանց առաջին արձագանքը հեգնանքն էր:

Արամ Մանուկյանը ասաց. «Տո, լավ են անում թանկացնում են, շատ էլ ճիշտ են անում»:

Իսկ Արմեն Մարտիրոսյանը կատակեց` ասելով որ անգամ մեկնաբանելու կարիք էլ չկա: «Ճիշտ են անում, Հայաստանի իշխանությունները թանկացնում են ամեն ինչը, որ ավելի հեշտացնեն քաղաքացիների ապրելակերպը, որ սոցիալապես ավելի ապահով դարձնեն երկիրը, ու որ քաղաքացիները էլ որևէ խնդիր չունենան»,- ասաց նա:

Արմեն Մարտիրոսյանը նշեց, որ թեեւ բնակիչների համար ջրի սակագինը չի բարձրանում, բայց մեծածախի դեպքում սակագինը բարձրացնելը միևնույն է` ազդելու է բոլորի վրա, այսինքն` բոլորն են տուժելու դրանից: Գյուղացին պարտադրված թանկացնելու է գյուղատնտեսական մթերքը:

«Դե որ ջուրը, էլեկտրաէներգիան, գազը թանկ են, մնացած բաներն էլ հերթով թանկանալու են: Ցանկացած էներգառեսուրսի թանկացում, որը նաև հիմքն է բոլոր արտադրական հարաբերությունների, իր հետ բերելու է թանկացումներ` հարվածելով քաղաքացիների սոցիալական վիճակին»,- ասաց Արմեն Մարտիրոսյանը:

Արամ Մանուկյանն էլ առաջարկեց հակառակ հայտարարությամբ հանդես գալ. «Հարգելի մեծածախ ջուր օգտագործողներ, համաձա՞յն եք, որ ջուրը թանկացնենք: Եթե չեն արձագանքում, ուրեմն ամեն ինչ նորմալ է, և հանձնաժողովը ճիշտ է անում, որ թանկացնում է»: