Մարդը ծնված չէ ուտելու համար

«Մինչև գլոբալ ճգնաժամը տնտեսության մեջ գրանցեցինք դրական աճ, հատկապես` աղքատության կրճատում 27 տոկոսով, որից 7 տոկոսը ամենածայրահեղ աղքատներն էին»,-  այսօր լրագրողների հետ հանդիպման ժամանակ ասաց սոցիոլոգ Ահարոն Ադիբեկյանը` հավելելով, որ 2 տարի անց ճգնաժամի պատճառով աղքատության ցուցանիշը բարձրացավ` հասնելով 46 տոկոսի, իսկ բնակչության 85 տոկոսը կրեց տնտեսական կորուստներ:

«Այսօր կան ընտանիքներ, որոնք սննդի վրա ծախսում են աշխատավարձի 54 տոկոսը, ոմանք էլ` 85, նույնիսկ 90 տոկոսը»,- նշեց Հայաստանի սպառողների ասոցիացիայի նախագահ Արմեն Պողոսյանը:

Ըստ նրա` աշխատավարձի 85-90 տոկոսը միայն սննդի վրա ծախսող ընտանիքների երեխաները հիմնականում ապահովված չեն լինում հագուստով, գրենական պիտույքներով: «Մարդը ծնված է ոչ թե պոմիդոր, նույնիսկ կոշիկ սպառելու համար, այլ կյանքում կան հոգևոր հաճույքներ, որոնց համար գումարը, ցավոք, չի բավարարում»,- ասաց Ա. Պողոսյանը: