Հանդիպման հետաձգման պատճառը ՀԱԿ ակտիվիստները չեն

Ինչպես նշել էինք, նախատեսված էր, որ այսօր տեղի է ունենալու ՀԱԿ-իշխանական կոալիցիա երկխոսության հերթական հանդիպումը, սակայն այն հետաձգվել է մինչեւ հաջորդ երեքշաբթի:

Դրա պատճառը պարզելու համար խոսեցինք ՀԱԿ մամուլի խոսնակ Արման Մուսինյանի հետ:

«Այսօր հանդիպելու պայմանավորվածությունը եղել է նախնական: Իսկ վերջնական  պայմանավորվածություն պատվիրակությունների միջեւ ձեռք է բերվել երեքշաբթի օրվա համար: Հաղորդագրությունում ամեն ինչ ասված է»մ- նշեց նա:

Մեր հարցին, թե արդյո՞ք հետաձգումը կապված է ՀԱԿ ակտիվիստների ձերբակալության, նրանց ազատ արձակել-չարձակելու հետ, Ա. Մուսինյանը պատասխանեց. «Սա ընդամենը մեր ընդունած վերջնական պայմանավորվածությունն է»:

Զրուցեցինք նաեւ իշխանական կոալիցիան ներկայացնող պատվիրակության ղեկավար Դավիթ Հարությունյանի հետ: Վերջինս նույնպես ասաց, թե նախորդ հանդիպման ժամանակ նշվել է, որ այսօր հանդիպելու պայմանավորվածությունը նախնական է:

Հարցին, թե արդյո՞ք հետաձգումը կապված է ՀԱԿ ակտիվիստների ձերբակալված լինելու հետ, պատասխանեց. «Մենք պայմանավորվել էինք, որ այս թեմայով մեկնաբանություն չպետք է տանք, դրա համար չեմ տալիս»: