Գործազրկության մակարդակը՝ 5.6 տոկոս

Այս տարվա առաջին կիսամյակում Արցախում գործազրկության մակարդակը, հաշվարկված որպես զբաղվածության ծառայություններում գրանցված գործազուրկների եւ տնտեսապես ակտիվ բնակչության (զբաղվածներ եւ գործազուրկներ) հարաբերակցություն, կազմել է 5.6 տոկոս:

Օրերս հրավիրած մամուլի ասուլիսի ժամանակ ԼՂՀ ազգային վիճակագրական ծառայության նախագահ Մանուշ Մինասյանը, պատասխանելով «Երկիր»-ի հարցին նշել է, որ զբաղվածության մակարդակը վերջին 10 տարում էականորեն չի փոխվել:

Գործազրկության մակարդակի ամենաբարձր ցուցանիշն Արցախում եղել է 6.7 տոկոս: Հունվար-հունիսին տնտեսապես ակտիվ բնակչության թիվը հանրապետությունում կազմել է 60619 մարդ, զբաղվածների թիվը` 57228 մարդ, որոնցից 80,1 տոկոսը վարձու աշխատողներ են (ներառյալ` անհատ ձեռնարկատերերը), իսկ 19,9 տոկոսը՝ ինքնազբաղվածներ, մասնավորապես`` գյուղատնտեսությունում: Վարձու աշխատողների (ներառյալ` անհատ ձեռնարկատերերը) 20.2 տոկոսը բաժին է ընկել կառավարման եւ պաշտպանության, 19.1 տոկոսը կրթության եւ 11.5 տոկոսը արդյունաբերության ճյուղերին: