Թուրքերն ընդունում են, որ հայերի հանդեպ ցեղասպանություն են իրականացրել, սակայն մաքրում են իրենց արխիվները. WikiLeaks

WikiLeaks սկանդալային պարբերականը շարունակում է տպագրել Միացյալ Նահանգների դիվանագետների գաղտնի փաստաթղթերը: Ինչպես հայտնում է HayNews.am-ի լիբանանյան գործընկեր «Ռադիո Սևանը», հերթական փաստաթուղթը վերաբերվում է Հայոց ցեղասպանությանը: Այն իրենից ներկայացնում է 2004 թ-ին Ստամբուլում գործող ամերիկյան դիվանագետի` Պետքարտուղարությանն ուղղված մի նամակ, որը, իր մեջ պարունակելով բազմաթիվ թրքամետ տեղեկություններ, ունի նաև շատ հետաքրքիր բացահայտումներ:
Այսպես, դիվանագետը գրում է, որ թուրքերը պնդում են, թե դարասկզբին բախումների հետևանքով զոհվել են «ընդամենը մի քանի հարյուր հազար հայեր», սակայն իրենք էլ «կոտորել են բազմաթիվ թուրքերի»:
Անդրադառնալով այն հարցին, թե ինչու՞ Թուրքիան չի ընդունում Հայոց ցեղասպանության փաստը, ամերիկացի դիվանագետը համոզմունք է հայտնում, որ պաշտոնական Անկարան վախենում է հողային և ֆինանսական պահանջներից, որը կարող է ունենալ Հայաստանի Հանրապետությունը: Նա նաև գրում է Թուրքիայում առկա մեծ արխիվի մասին, որը կարևոր տեղեկություններ է պարունակում Ցեղասպանության մասին` չնայած նրան, որ թուրքերը մշտապես փորձել են մաքրել այն «անցանկալի վկայություններից»:
Այսպես, WikiLeaks-ը մեջբերում է թուրք պատմաբան Հալիլ Բըրքթայի վկայություններն այն մասին, որ այս տարիների ընթացքում երկու լուրջ փորձ է տեղի ունեցել` մաքրել ավելի քան 70 մլն փաստաթղթերը Ցեղասպանության մասին խոսող նյութերից:
«Առաջին փորձը եղել է 1918-ին, երբ դեռ դաշնակիցները չէին գրավել Ստամբուլը: Այդ էր պատճառը, որ երիտթուրք ղեկավարների դավատարութան ժամանակ բազմաթիվ փաստաթղթեր անհետացել էին: Երկորդն արդեն մեր օրերում է: Այն իրագործում են արդեն թոշակի գնացած զինվորականներն ու պատմաբանները: Բազմիցս եմ տեսել, որ նրանց ներկայացուցիչները օրերով արխիվից դուրս չէին գալիս` փնտրելով իրենց համար կարևոր ինչ-որ թղթեր»,-ասել է թուրք պատմաբանը:
Նկատենք, որ WikiLeaks-ը գրում թե, Անատոլիայում (Արևմտյան Հայաստան) բնակվող բազմաթիվ թուրքեր ամերիկյան դիվանագետների հետ մասնավոր զրույցներում ընդունում են իրենց նախնիների կատարած ոճրագործությունները: