Արտակարգ իրավիճակ` Լոռիում

Նախորդ օրերին տեղացած հորդառատ անձրևները Լոռիում մեծ վնաս են հասցրել մարզի մի շարք համայնքների:

Գյուլագարակ, Գարգառ, Ագարակ գյուղերում վնասվել են ցանքատարածություններ, քանդվել են գյուղամիջյան ճանապարհներ: Անձրևաջրերը լցվել են տասնյակ բնակիչների տների նկուղները, ողողել օժանդակ կառույցները: Դժվարանցանելի է դարձել Վանաձոր-Ստեփանավան ավտոմայրուղին:

Նախօրեին Լոռու մարզի փրկարարական ծառայություն գրություն է ստացվել նաև Դարպասի համայքապետից, որ երկար տեղացած անձրևից քանդվել է գյուղի 7-8 նրբանցք, 1.3 կմ հատված գյուղամիջյան ճանապարհից, խցանվել է 150 մ երկարությամբ թունել-սելավատարը:

Քիչ չեն եղել նաև մարզկենտրոն Վանաձորին պատճառված վնասները:  Սելավից գոյացած ջրի հոսքերն իրենց հետ ավազ ու քարեր են տեղափոխել փողոցներ` խանգարելով երթևեկին, տուժել են նաև տնակային ավաններն ու քաղաքի ծայրամասային թաղամասերը: