Պաշտոնյաները քաղաքացիներին "բանի տեղ" չեն դնում

Նախորդ եռամսյակում «Ինֆորմացիայի ազատության կենտրոն»-ի սեւ ցուցակում հայտնված պաշտոնյաներն արդեն օրենքով սահմանված կարգով ինֆորմացիա տրամադրելու համար այս եռամսյակում հայտնվել են լավագույնների շարքում:

Կենտրոնի նախագահ Շուշան Դոյդոյանը նշեց, որ լրագրողների բարձրացրած աղմուկի շնորհիվ են բարեփոխումներ կատարվել: Օրինակ` Ստեփանավանի քաղաքապետն այլևս մեկ էջ ինֆորմացիան չի տրամադրում 500 դրամ վճարելու պայմանով:

Իսկ ահա առողջապահության նախարարությանն ուղարկված 8 հարցումները ստացել են պատասխաններ, այն էլ` օրենքով սահմանված 5-օրյա ժամկետում:

Նշենք, որ թե' կենտրոնը, թե' մի շարք քաղաքացիներ պետական կառավարման եւ տեղական ինքնակառավարման մարմիններին ուղարկել են տեղեկատվություն ստանալու 120 հարցում` էլեկտրոնային եւ գրավոր: Տիկին Դոյդոյանի տեղեկացմամբ` քաղաքացիների ուղարկած հարցումները մեծ մասամբ անպատասխան են մնացել: «Եղել են անգամ դեպքեր, երբ քաղաքացու հարցմանը չեն պատասխանել, բայց երբ նույն հարցը մենք ենք ուղարկել, պատասխանել են: Ստացվում է` քաղաքացիներին լուրջ չեն ընդունում»,- նշեց նա: