Քաղաքապետարանի որոշումը բանի տեղ չեն դնում

Այսուհետ թեւկապներով հսկիչները վարորդներից գումար գանձելու իրավունք չունեն. Երեւանի քաղաքապետարանի տրանսպորտի վարչության պետ Հենրիկ Նավասարդյանի խոսքն է՝ ասված այս տարվա հուլիսի 1-ին կայացած ասուլիսում:

Երեւանի փողոցներում կարմիր գծանշումներով առանձնացվել են վճարովի ավտոկայանատեղիների տարածքները: Այդտեղ մինչեւ 5 րոպե տեւողությամբ կանգառ կատարելը անվճար է, մինչեւ մեկ ժամ կայանելը` 100 դրամ, մեկ օրը` 500, մեկ շաբաթը` 1000, մեկ ամիսը` 2000 դրամ, մեկ տարին՝ 12000 դրամ: Երեկոյան ժամը 24:00-ից մինչեւ առավոտյան ժամը 9:00-ն կայանելու համար գումար չի գանձվի: Վճարումները կատարվելու են բացառապես անկանխիկ եղանակով, նաեւ՝ SMS հաղորդագրության միջոցով:

Որոշումը վարորդների դժգոհությունն է առաջացրել: Որոշման արդյունավետությանը կանդրադառնանք հաջորդ հրապարակման մեջ, իսկ այժմ փաստենք, որ Երեւանի քաղաքապետարանի համար արդեն սովորական բան է դարձել, որ իր որոշումները չեն կատարվում: Հանրապետության հրապարակում, Տիգրան Մեծի պողոտայում, Վարդանանց փողոցում, Աբովյան փողոցում, Մալաթիա տոնավաճառին հարող փողոցի ողջ երկայնքով եւ բազմաթիվ այլ փողոցներում կանգնած են թեւկապավոր, համազգեստով քաղաքացիներ ու պահանջում են 100-200 դրամ:

Երեւանի քաղաքապետարանում հուլիսի 15-ին` հերթական խորհրդակցության ժամանակ, նշվել էր, որ Երեւանում գործող ավտոկանգառներում ապօրինի գումարների գանձումը բացառելու նպատակով ձեռնարկվել են ծանուցողական եւ հանրային իրազեկման անհրաժեշտ տարբեր միջոցառումներ: Անհասկանալի է՝ ինչու է մեկ ամիս շարունակ Երեւանի քաղաքապետարանը իր իսկ որոշումն անտեսում: Արդյո՞ք Երեւանի քաղաքապետարանը չի կարողանում զսպել այդ մանր ու մեծ շորթողների ախորժակը: Փաստորեն, Երեւանի քաղաքապետարանը բանի տեղ չի դնում իր իսկ որոշումը կամ դնում է բանի տեղ: