Արցախի հարցը Չավուշօղլուի ցեղակիցների գործը չէ

Չավուշօղլուն ԵԽԽՎ նախագահի պաշտոնը շփոթել է իր հայրիկի դուքանի հետ. այսօր լրագրողների հետ հանդիպման ժամանակ ասաց ՀՀԿ մամուլի խոսնակ Էդուարդ Շարմազանովը` անդրադառնալով Չավուշօղլուի այն հայտարարությանը, թե Հայաստանը եւ Թուրքիան բանակցությունների արդյունքում համաձայնություն են ձեռք բերել Արցախի որոշ տարածքներ հանձնելու վերաբերյալ:

«Չի կարելի նման անպատասխանատու հայտարարություններ անել, սուտ ու կեղծիք տարածել, մանավանդ որ, բացի արձանագրություններից, որեւէ բան չկա: Ավելին` բազմիցս ասել ենք, որ հայ-թուրքական պրոցեսն ու Արցախի խնդիրն իրար հետ որեւէ առնչություն ունենալ չեն կարող»,- ասաց Է. Շարմազանովը:

Նա նշեց նաեւ, որ Թուրքիան մինչեւ խնդրին անդրադառնալն ու կեղծ ժողովրդավար ձեւանալը, թող նախ իր խնդիրները լուծի` զորքերը դուրս բերի Հյուսիսային Կիպրոսից, 301-րդ հոդվածը հանի, լուծի քրդերի հարցը. «Դա Չավուշօղլուի եւ նրա ցեղակիցների գործը չէ, եթե ուզում են օգուտ տալ ԼՂ հարցի կարգավորմանը, ապա թող չզբաղվեն դրանով»: