Շեֆի հարցազրույցը դեռ չեն կարդացել

2010-ին, երբ ստորագրվեց Գյումրիի ռուսական ռազմակայանի տեղակայման ժամկետի երկարաձգման համաձայնագիրը, ՀԱԿ որոշ անդամներ խիստ դեմ արտահայտվեցին դրան: «Մոսկովսկիե նովոստի» թերթին տված այսօրվա հարցազրույցում Կոնգրեսի առաջնորդ Լեւոն Տեր-Պետրոսյանը այդ քայլը որակել է շատ ճիշտ որոշում եւ  100 տոկոսով Հայաստանի անվտանգության երաշխիքային համակարգի մաս:

ՀԱԿ անդամները, սակայն, պարզվում է` չեն էլ կարդացել իրենց առաջնորդի հարցազրույցը: Հովհաննես Հովհաննիսյանը, ով ժամանակին հայտարարել էր թե մեկ այլ երկրի ռազմակայանների տեղակայումը վտանգում է այդ երկրի ինքնուրույնությունը, խոստացավ ավելի ուշ ծանոթանալ Տեր-Պետրոսյանի հարցազրույցին:

Շեֆի հարցազրույցը  «գործերն ավարտելուց հետո»  խոստացավ կարդալ նաեւ Երջանիկ Աբգարյանը, որը ռազմակայանների տեղակայման մասին ասել էր, թե դրանով ՌԴ-ն հնարավորություն է ստանում գնահատել Հայաստանում ներքին սպառնալիքները եւ միջամտել Հայաստանի ներքին գործերին:

Ստացվում է, երբ Լեւոն Տեր-Պետրոսյանը չի խոսում, նա մարգարե է ՀԱԿ-ականների համար, նրանից մեջբերումներ են անում, իսկ երբ հարցազրույց է տալիս, «մարգարեին» կարդացողներ չկան: