Կոծկելը փնտրիր քո նախկին շեֆի մեջ. ՕԵԿ-ական պատգամավորը` Ալեքսանդր Արզումանյանին

ՕԵԿ խմբակցության պատգամավոր Հովհաննես Մարգարյանը փետրվարի 28-ին` ԱԺ ճեպազրույցների ժամին, անդրադարձավ նախօրեին ԱԺ նիստում իր և պատգամավոր Ալեքսանդր Արզումանյանի միջև եղած բախմանը: «Ես սովորություն չունեմ իմ գործընկերներին վիրավորելու, բայց նա իրեն իրավունք վերապահեց քաղաքական չորս ուժերին մեղադրել մարտիմեկյան իրադարձությունները կոծկելու մեջ: Ես ընդամենն ասացի, որ մենք երբեք որևէ բան չենք կոծկել, և դու կոծկելը փնտրիր քո նախկին շեֆի մեջ, կազմակերպիչների մեջ, կոծկողների մեջ, ովքեր չեկան և ոչ մի ցուցմունք չտվեցին, որովհետև ես հանձնաժողովի անդամ էի: Ես ընդամենը այդ ասացի, որ ինքը չփորձի մեզ մեղադրել առանձնապես ծանր հանցագործությունների մեջ, էդ իրավունքն իրեն ոչ ոք չի վերապահել, և մենք երեք տարի հետևողականորեն աշխատել ենք»,- ասաց նա՝ նշելով, որ հենց ինքն է աշխատել ՕԵԿ-ի կողմից Մարտի 1-ի հանձնաժողովում:

ՕԵԿ-ն, ըստ Մարգարյանի, կողմնակից է եղել, որ բացահայտվեն թե' այդ օրվա սադրիչները, թե' կազմակերպիչները, թե' մեղավորները: ՕԵԿ-ականի խոսքով` հանցագործությունը վաղեմության ժամկետ չունի, և չբացահայտված, չպատժված յուրաքանչյուր հանցագործություն ու հանցագործ ծնում է նոր հանցագործի ու հանցագործություն: