Ո՞ւմ էր ուղղված համանախագահների հայտարարությունը

ՀՀԿ խմբակցության ղեկավար Գալուստ Սահակյանի համոզմամբ` Ռուսաստանի, ԱՄՆ-ի և Ֆրանսիայի  նախագահների՝ Լեռնային Ղարաբաղի հակամարտության կարգավորման վերաբերյալ համատեղ հայտարարությունը բավական նպաստավոր էր մեզ համար. խորհրդարանական ճեպազրույցների ժամանակ ասաց Գալուստ Սահակյանը եւ հավելեց. «Ամբողջ աշխարհը գիտի մեր տեսակետը` Ղարաբաղը չի կարող լինել Ադրբեջանի կազմում»:

Նրա համոզմամբ` հայտարարությունն ուղղված էր ոչ թե մեզ, այլ Ադրբեջանին:

Իսկ ՀՅԴ խմբակցության պատգամավոր Արծվիկ Մինասյանը նշեց, որ այդ հայտարարության մեջ Հայաստանի և Ադրբեջանի վարքագծի միջև հավասարության նշան է դրվում, ինչն անընդունելի  է, հատկապես` Ադրբեջանի ագրեսիվ պահվածքի և զինադադարն անընդհատ խախտելու պայմաններում: 

ՕԵԿ խմբակցության պատգամավոր Հովհաննես Մարգարյանի կարծիքով` վերջապես հնչել է մի հայտարարություն, որում նշվում է, որ հարցը պետք է խաղաղ լուծում ստանա, իսկ դրա շուրջ պետք է վերլուծություն անի ադրբեջանական կողմը, մասնավորապես` Ալիեւը: