ԵԱՀԿ համանախագահների հայտարարությունը՝ Նալբանդյան-Մամեդյարով հանդիպումից հետո

ԵԱՀԿ Մինսկի խմբի համանախագահները հայտարարություն են տարածել Հայաստանի և Ադրբեջանի արտգործնախարարների՝ հունիսի 11-ի երեկոյան Բրյուսելում կայացած հանդիպման վերաբերյալ:

Համանախագահների պաշտոնական կայքում հրապարակված հայտարարության մեջ նշվել է, որ ԱԳ նախարարների հանդիպման նպատակը եղել է Լեռնային Ղարաբաղի հակամարտության կարգավորման ուղղությամբ հետագա աշխատանքի եղանակների քննարկումը:

«Նախարարները համաձայնեցին իրենց նախագահներին փոխանցել այս տարի ավելի ուշ բարձր մակարդակի հանդիպման՝ համանախագահների առաջարկը: Համանախագահներն այդ հանդիպումը կազմակերպելու հարցում իրենց աջակցությունն առաջարկեցին»,-նշվել է հայտարարության մեջ: Հանդիպման ընթացքում քննարկվել է նաև շփման գծում ներկայիս իրավիճակը:

Համանախագահների տարածած հայտարարությունում նշվել է նաև, որ նախարարները և համանախագահները համաձայնել են սեպտեմբերին կրկին հանդիպել Նյու Յորքում՝ ՄԱԿ-ի Գլխավոր ասամբլեայի 72-րդ նստաշրջանի ընթացքում: