Սիրիան հույսը դրել է Ռուսաստանի վրա

Ներքին ճգնաժամ ապրող Սիրիան ակնկալում է Ռուսաստանի քաղաքական աջակցությունը. այսօր սիրիական պետական հեռուստաընկերությանը տված հարցազրույցում ասել է երկրի արտգործնախարար Վալիդ Մուալեմը:

«Մենք մեծ հույսեր ենք կապում Ռուսաստանի դիրքորոշման հետ»,- ասել է նա:

Նախարարի կարծիքով` երբ Ռուսաստանն ու Չինաստանը ձեռնպահ մնացին ՄԱԿ-ի Անվտանգության խորհրդում Լիբիայի դեմ ուղղված բանաձեւի քվեարկության ժամանակ, ՆԱՏՕ-ն գերլիազորություններ ստանձնեց` թաքնվելով այդ փաստաթղթի հետեւում:

«Այդ կապակցությամբ հարց ունեմ այն երկրներին, որոնք վետոյի իրավունք ունեն Անվտանգության խորհրդում. կթողնե՞ն, որ սիրիական խնդիրն էլ արեւմտյան ուժերը լուծեն իրենց հայեցողությամբ»,- հարց է տվել Մուալեմը` հավելելով, որ մեծ կասկածներ ունի:

Նախարարը սխալ է համարում նախագահ Ասադի եւ մի շարք բարձրաստիճան պաշտոնյաների հանդեպ Եվրամիության սահմանած պատժամիջոցները: Ըստ նրա` դրանք ուժի տրամաբանության դրսեւորումներ են եւ ոչ մի օրինական հիմք չունեն:

Մուալեմի կարծիքով` Արեւմուտքի նպատակը Սիրիան թուլացնելն է, սակայն նա համոզված է, որ Սիրիայում լիբիական սցենարը չի կրկնվի:

Վերջում նախարարը հավելել է, որ իրենք պատրաստվում են ամրապնդել իրենց հարաբերությունները Ռուսաստանի, Չինաստանի, Վենեսուելայի եւ Ասիայի երկրների հետ, որ ապացուցեն` «աշխարհը միայն Ամերիկան ու Արեւմուտքը չեն»: