Ռուս լրագրողին չեն թողնում Բաքու գնալ

Эхо Москвы ռադիոկայանի գլխավոր խմբագրի տեղակալ Սերգեյ Բունտմանին արգելված է մտնել Ադրբեջան: Այդ մասին հայտարարել է Ադրբեջանի արտգործանախարարությունը. տեղեկացնում է «Ինտերֆաքս»-ը:

Ադրբեջանական «սեւ ցուցակում» են հայտնվում այն բոլոր օտարերկրացիները, ովքեր առանց Բաքվի թույլտվության այցելում են Լեռնային Ղարաբաղ եւ ազատագրված տարածքներ:

«Պատճառն այն է, որ մենք եղել ենք Ղարաբաղում, եւ ես հարցազրույց եմ վերցրել նախագահ Սահակյանից»,- ասել է Բունտմանը, որը ներկայումս Երեւանում է եւ պատրաստվում է վերադառնալ Մոսկվա:

Ռադիոկայանի գլխավոր խմբագիր Ալեքսեյ Վենեդիկտովը հայտարարել է, որ նամակով դիմելու է Ադրբեջանի նախագահ Իլհամ Ալիեւին. «Լրագրողի գործը տեղեկություններ հավաքելն է, դրանք վերլուծելն ու պատմելը, թե ինչ է կատարվում»:

Նա նաեւ նշել է, որ ինքը Բունտմանին գործուղել է Բաքու եւ չի պատրաստվում այդ գործուղումը չեղյալ համարել, թեեւ Բունտմանն ասել է, թե տեղյակ չէ, որ իր ղեկավարներն իրեն Ադրբեջան գործուղելու պլաններ են ունեցել: