Նախարարի բաց զրույցը

Բոլոնիայի գործընթացում կան թերություններ, բայց դրանք կան բոլոր երկրներում, որոնք միացել են այդ ծրագրին. լրագրողների հետ հանդիպման ժամանակ հայտարարեց ՀՀ կրթության եւ գիտության նախարար Արմեն Աշոտյանը:

Այս տարի Բոլոնիայի գործընթացի անդամ բոլոր երկրները պատրաստել են իրենց ազգային հաշվետվությունը. ԿԳՆ-ի դրամաշնորհի շրջանակում «Այ Փի Էս Սի» քաղաքական եւ սոցիոլոգիական խորհրդատվության ինստիտուտը 2011-ի փետրվար եւ մարտ ամիսներին նույնպես իրականացրել է հետազոտություն: Արդյունքում պարզվել է, որ կան մի շարք խնդիրներ, մասնավորապես` ուսանողների պրակտիկայի, կրթություն-աշխատաշուկա, մագիստրոսական կրթության բովանդակության եւ այլ հարցերի հետ կապված:

ԿԳ նախարարը հավաստիացնում է, որ բոլոր խնդիրները կհարթվեն, բայց դրա համար ժամանակ է պետք: «Առաջին անգամ ուսումնասիրել ենք ուսանողների կարծիքը»,- ասաց նա:

Ի դեպ, 2012թ. Բուխարեստում կկայանա գագաթաժողով` Բոլոնիայի գործընթացի անդամ երկրների ներկայացուցիչների մասնակցությամբ: Իսկ այս տարվա հուլիսի 1-ից Հայաստանը եւ Լեհաստանը հանդես են գալու որպես գործընթացի համանախագահողներ եւ մինչեւ դեկտեմբեր կիրականացնեն 4 ծրագիր: