ՉՈՐՐՈՐԴ ԻՆՔՆԻՇԽԱՆՈՒԹՅՈՒՆ. "Էլիտար մաֆիայի" հյուպատոս կավատը

Ֆրանսիայում ձերբակալված կավատ Ռայմոնդին սփյուռքի նախարար Հրանուշ Հակոբյանն անցած տարի Սերժ Սարգսյանին եւ արտգործնախարար Էդվարդ Նալբանդյանին ներկայացրել է որպես բարեգործ եւ արվեստի մեկենաս:

Խայտառակությունն այն է, որ Ռայմոնդը ճանաչել եւ մտերիմ է եղել հայկական «էլիտայի» բազում դեմքերի հետ: Չգիտես` ինչու, ֆրանսիական ոստիկանությունն այդ էլիտային անվանում է «հայկական մաֆիա եւ իշխանություններ». ներկայումս հետաքննությունը պարզում է Ռայմոնդի կապերը հայկական «էլիտար մաֆիայի» հետ:

Ըստ ֆրանսիական մամուլի` կավատը զբաղվել է թմրաբիզնեսով, մասնավորապես` կոկաինի առեւտրով: Ճիշտ է` բարձրաստիճան հայրենակիցներին նա հյուրընկալել է եւ հյուրասիրել: Ի դեպ, բոլորովին պատահաբար պարզեցինք, որ Ռայմոնդը նաեւ Հայաստանի պատվավոր (՞) հուպատոսն է  Քոթ դ'Իվուարում:

Եթե որեւէ օրինավոր երկրում պարզվեր, որ նախարարը երկրի ղեկավարին ծանոթացրել է կավատության եւ կոկաինի առուվաճառքի մեջ մեղադրվող մարդու հետ, այդ բացահայտմանը կհետեւեր առնվազն նախարարի հրաժարականը: Միաժամանակ նաեւ այն բոլոր մարդկանց հրաժարականները, ում անուններն առնչվում են այս խայտառակ պատմությանը:

Այնքան խառտառակ, որ «Պզոյի» հանցախմբի մերկացումից հետո համաշխարհային ԶԼՄ-ները դարձյալ Հայաստանի եւ հայերի վերաբերյալ օգտագործում են «հայկական մաֆիա եւ դրա կապերը Հայաստանի իշխանությունների հետ» բառակապակցությունը: