Հրաձգության հուշամրցաշար

Գեղարքունիքի մարզի Լիճք գյուղն Արցախյան ազատամարտին իր մասնակցությունն է ցուցաբերել 106 հոգուց բաղկացած կամավորական ջոկատով, որի կազմավորմանը, որպես փորձառու խորհրդատու և աջակից, մեծապես նպաստել է Լիճքի միջնակարգ դպրոցի նախկին զինղեկ Հայկ Խաչատրյանը:

Եվ արդեն 5-րդ տարին է` Լիճքի Հովհ. Թումանյանի անվան միջնակարգ դպրոցի տնօրինությունը, համագործակցելով ՀՅԴ տեղական կառույցների հետ, օդամղիչ հրացանով հրաձգության մրցաշար է կազմակերպում` նվիրված Հ. Խաչատրյանի հիշատակին:

ՀՅ Դաշնակցությունը փոխանցիկ գավաթ է սահմանել հաղթողների համար, իսկ բոլոր մրցանակակիրների ու մասնակիցների համար` տարաբնույթ խրախուսական նվերներ: Դրանք այս տարի հանձնեցին Արցախյան ազատամարտի մասնակիցներ` Շուշիի առանձնակի գումարտակի փոխհրամանատար, ՀՅԴ ազատամարտիկների հանձնախմբի անդամ Հարմիկ Հովսեփյանը եւ ՀՅԴ Հայաստանի ԳՄ անդամ Թաթուլ Հարությունյանը:

Ի դեպ, ապրիլի 1-ին կայացած 6-րդ հուշամրցաշարը նաև Քարվաճառի ազատագրման 18-ամյակին էր նվիրված:

Այս տարի իրենց ուժերն էին չափում ավելի քան 60 մասնակիցներ: Լավագույն արդյունքը ցույց տվեց Մարտունու թիվ 2 հանրակրթարանի թիմը` 202 միավոր ընդհանուր արդյունքով: Հաղթողները նաև իրավունք ստացան մասնակցելու Գարեգին Նժդեհի 125-ամյակին նվիրված հանրապետական մրցաշարի մարզային փուլին: