Գրքի միջազգային ցուցահանդես` Երեւանում

Հայկական գրատպության 500-ամյակին եւ ՅՈՒՆԵՍԿՕ-ի կողմից Երեւանը գրքի մայրաքաղաք հռչակելուն ընդառաջ` ապրիլի 21-23-ը Երեւանում կանցկացվի գրքի միջազգային ցուցահանդես, որը կազմակերպում է Հրատարակիչների ազգային ասոցիացիան` ՀՀ մշակույթի նախարարության, Երեւանի քաղաքապետարանի, Խնկո Ապոր անվան մանկապատանեկան գրադարանի հետ համատեղ:

Ապրիլի 23-ը նաեւ գրքի եւ հեղինակային իրավունքի միջազգային օրն է:

Ցուցահանդեսին կմասնակցի շուրջ 50 հրատարակիչ, որոնք կներկայացնեն վերջին տարիների լավագույն հրատարակությունները:

Արդեն նախնական պայմանավորվածություն կա Վրաստանի, Իրանի եւ Լիբանանի հետ: Մասնակցելու են նաեւ Հայաստանում գտնվող դիվանագիտական ներկայացուցիչները. դեսպանատները կներկայացնեն իրենց գրողներին եւ իրենց երկրների վերջին հրատարակությունները:

Միջոցառումների շրջանակում կցուցադրվեն հեղինակային իրավունքների խախտման դեպքերին վերաբերող ծաղրանկարներ, ցուցահանդեսը կլինի նաեւ շրջիկ: Նախատեսվում է անցկացնել սեմինար` նվիրված հեղինակային իրավունքի պաշտպանությանը: