Թույները գրոհում են Երեւանը

Նուբարաշենի թունաքիմիկատների գերեզմանոցի խնդիրը շատ լուրջ է, եւ վտանգ է ներկայացնում ոչ միայն Երեւանի, այլեւ ամբողջ Արարատյան դաշտավայրի համար:

«Սակայն քաղաքն ի վիճակի չէ ինքնուրույն լուծել այդ խնդիրը, դա կառավարության մակարդակով լուծվելիք հարց է»,- այսօր լրագրողներին ասաց բնապահպան Կարինե Դանիելյանը:

Նրա կարծիքով` թեեւ խնդիրը միջազգային կառույցների ուշադրության կենտրոնում է, որոնք նոր ուսումնասիրություններ են ցանկանում իրականացնել, սակայն դրանք շատ են ձգձգվում: Ըստ բնապահպանի` անհրաժեշտ է են ե'ւ օպերատիվ, ե'ւ ռազմավարական միջոցառումներ:

«Պետք է որքան հնարավոր է մեկուսացնել աղբավայրը, բայց դա խնդիրը միայն ժամանակավորապես կլուծի»,-ասաց նա` հավելելով, որ աղբավայրն այնպիսի վիճակում է, որ բոլոր թույները պետք է դուրս բերվեն ու ոչնչացվեն, ընդ որում` այդ գործընթացը հարկավոր է հնարավորինս արագ իրականացնել:

Բնապահպանն ահազանգում է` վերջին ուսումնասիրությունները ցույց են տալիս, որ շրջակա միջավայրի աղտոտվածությունն ընդլայնվում է եւ արդեն հասնում է Երեւանին: