ՉՈՐՐՈՐԴ ԻՆՔՆԻՇԽԱՆՈՒԹՅՈՒՆ. "Կոշ"-ում "բենզինիստներ" կան

Կապված «Կոշ» քրեակատարողական հիմնարկում  ինքնասպանության վերջին դեպքի հետ` երեկ թերթը գրել էր, որ կալանավայրում տարածված է տոքսիկամանիան, հատկապես` հատուկ մշակվող բենզին ներարկելու եղանակով:

Մեր տեղեկություններով` ներկայումս «Կոշ»-ում պահվող մոտ 1000 կալանավորների մեջ կա նարկոդիսպանսերում գրանցված 35-40 մարդ, որ «ավանդական» կախվածություն ունեն, եւ 20-25 մարդ, որ կալանավայրում ընդունված տերմինով` «բենզինիստ» են:

Կալանավորվածների շրջանում բենզինով «կայֆը» շատ հարգի է, որովհետեւ բենզինը, «կիսլատան» եւ բաղադրիչ 4 թմրադեղերը համեմատաբար հեշտությամբ են ճարվում, եւ համարվում է, որ «բենզինով կոկտեյլը» մաքուր հերոինից ու կոկաինից ավելի սուր հաճույք է պատճառում:

Ի դեպ, հայաստանյան կալանավայրերում վաղուց չեն կիրառվում հացի վրա քսած վաքսը, օդեկոլոնը եւ սովետական ժամանակներում ընդունված այլ նման թմրամիջոցներ:

Մեր աղբյուրի պատմելով` «բենզինիստը» շատ արագ քայքայվում է բառի բուն իմաստով` պարզապես ողջ-ողջ փտում է ու նեխում: