Ավերիչ երկրաշարժ եւ ցունամի` Ճապոնիայում

Այսօր Ճապոնիայում տեղի է ունեցել 8,8 մագնիտուդով հզոր երկրաշարժ: Էպիկենտրոնը գտնվել է Տոկիոյից  382 կմ հյուսիս-արեւելք: Մայրաքաղաքում ուժեղ ցնցումները դեռ շարունակվում են:

Ըստ «Ֆրանս պրես» գործակալության` Ճապոնիայի իշխանություններն արդեն հաղորդել են զոհերի մասին:

Ճապոնական հեռուստատեսությամբ ցուցադրել են կադրեր երկրի հյուսիսային շրջաններում մոլեգնող ցունամիի մասին, որը զգալի ավերածություններ է առաջացրել:

Միյագի նահանգում ցունամիի բարձրությունը հասել է 10 մետրի: Իսկ Իվատե նահանգում արագընթաց մայրուղու մի մասը փլուզվել է ծովը, տասնյակ մեքենաներ ջրասույզ են եղել:

Ցունամիի սպառնալիքի պատճառով  արտակարգ դրություն է հայտարարվել նաեւ Ռուսաստանի Սախալին եւ Կուրիլյան կղզիներում: