Կուտակային համակարգը կպայքարի ստվերային աշխատավարձերի դեմ

Նախորդ տարվա դեկտեմբերի 22-ին Ազգային ժողովը երրորդ ընթերցմամբ ընդունեց կենսաթոշակային համակարգի բարեփոխումների իրականցմանն ուղղված օրենքների փաթեթը, համաձայն որոնց` 2011 թվականից նախատեսվում է կիրառելի դարձնել կենսաթոշակի կամավոր կուտակային, իսկ 2014-ից` պարտադիր կուտակային համակարգը:

Այսօր լրագրողների հետ հանդիպման ժամանակ ՀՀ աշխատանքի եւ սոցիալական հարցերի նախարարության կենսաթոշակային ապահովության վարչության պետ Սմբատ Սաիյանը նշեց, որ ներկայումս նոր համակարգին անցնելու համար իրականացվում են նախապատրաստական աշխատանքներ:

Համաձայն վերոնշյալ օրենսդրական փոփոխությունների` նախատեսվում է կենսաթոշակային միաստիճան համակարգը փոխարինել բազմաստիճանով: Այսինքն` եթե մինչ այժմ անձի կենսաթոշակը ֆինանսավորվում էր միայն պետական միջոցներից, ապա այժմ կֆինանսավորվի տարբեր աղբյուրներից:

Կենսաթոշակի ձեւավորման համակարգը եռաստիճան է լինելու: Առաջին` բաշխողական ֆինանսավորման աստիճանը մյուս երկուսից տարբերվում է նրանով, որ միայն պետբյուջեից է ստացվում: Այն, ըստ էության, ներկայումս գործող մեր համակարգն է:

Երկրորդի` կամավոր կուտակայինի դեպքում անձն ինքն է կուտակում իր կենսաթոշակը` աշխատանքային գործունեության ընթացքում օրենքով սահմանված չափով եւ կարգով պարտադիր վճարումներ կատարելով: Կուտակված գումարը նա տնօրինելու հնարավորություն է ստանում կենսաթոշակային տարիքը լրանալուց հետո:

Իսկ երրորդը` պարտադիր կուտակայինը, երկրորդից տարբերվում է միայն նրանով, որ այս դեպքում անձը վճարումները կատարում է պարտադիր հիմունքներով:

«Այս համակարգը թույլ է տալիս մի շարք այլ խնդիրներ լուծել տնտեսությունում, մասնավորապես` ստվերային աշխատավարձերի կրճատում, ինչպեսեւ ֆինանսավորման միջոցների դիվերսիֆիկացիա»,- ասաց Նասդաքի փորձագետ Հայկ Ոսկանյանը: