Սոցիալական քարտերն այլեւս պետք չե՞ն

Հայաստանում 2011-ի սեպտեմբերից կներդրվեն կենսաչափական տվյալներով անձնագրերը եւ նույնացման քարտերը: Այդ մասին այսօր լրագրողների հետ հանդիպման ժամանակ հայտնեց ոստիկանության անձնագրային  եւ վիզաների վարչության պետ Նորայր Մուրադխանյանը:

Էլեկտրոնային անձնագրի չիպում, քաղաքացու անունից, ազգանունից, հայրանունից, ծննդյան թվականից ու վայրից բացի, կլինեն նաեւ երկու ցուցամատերի մատնահետքերը: Սակայն Մուրադխանյանը չբացառեց նաեւ, որ հետագայում նաեւ այլ տեղեկություններ ներառվեն, օրինակ` վարորդական իրավունքի կամ առողջության վերաբերյալ տվյալներ:

Նորայր Մուրադխանյանը տեղեկացրեց, որ նույնականացման քարտը կարժենա մոտավորապես 1000, իսկ էլեկտրոնային անձնագիրը` 15 հազար դրամ:

«Սոցիալական քարտերն էլ աստիճանաբար դուրս կգան շրջանառությունից»,- ենթադրեց Մուրադխանյանը` նշելով, որ նույնականացման քարտի վրա նշված կլինի նաեւ սոցիալական քարտի համարը, իսկ սոցիալական քարտ չունեցողների նույնականացման քարտում այդ բաժինը պարզապես բաց կթողնվի: